Está proxectado un novo colector de augas pluviais que, recollendo as precipitacións de auga, alivie a galería de saneamento que atravesa Alfonso Molina, desaugando na cámara de tranquilización na canle do río Mesoiro
O Concello da Coruña vén de licitar os traballos para construír a nova rede de saneamento no sector noroeste do Barrio das Flores, entre a parte baixa da rolda Camilo José Cela e a avenida Salvador de Madariaga, unha intervención ideada para osixenar, ampliar e renovar o circuíto de augas residuais e pluviais na contorna.
A rede de saneamento do barrio está estruturada entre dous colectores principais, de funcionamento unitario, nas caras noroeste e sureste da rolda Camilo José Cela, que recollen as augas correspondentes a cada unha das dúas vertentes nas que se divide o barrio, a partir da divisoria pola que transita o poliduto.
A este respecto, o Goberno municipal ten previsto actuar sobre a vertente noroeste, onde está proxectado un novo colector de augas pluviais que, recollendo as precipitacións de auga sobre unha superficie aproximada de 100.000 metros cadrados, alivie a galería de saneamento que atravesa a avenida de Alfonso Molina.
Dadas as alteracións de tráfico que implicará levar a cabo esta intervención, a formulación establecida polo servizo municipal de Infraestruturas é que aobra fique dividida en dúas fases.
A primeira, a que saíu xa a licitación, abrangue a execución da nova rede de saneamento separativa nun treito de case 165 metros que, desde a parte baixa da rolda Camilo José Cela, atravesa a mesma ata chegar á avenida Salvador de Madariaga, para cruzala posteriormente cara a cámara de tranquilización, localizada baixo o campo de fútbol Víctor Fernández Alonso.
O obxectivo do Goberno de Inés Rey é que, unha vez que se concrete esta primeira fase, continúe coa posta en marcha da segunda, que implicará a instalación da nova rede de saneamento separativa nun treito de 470 metros que, desde o sector superior da rolda Camilo José Cela, irá baixo o carril de subida da mesma ata chegar ao pozo onde está previsto iniciar a actuación previa, localizado a escasos metros do cruzamento con Salvador de Madariaga.
